Jer 29 | ZomZIV | STEP | Hih in, Babylon pan Jerusalem ah Nebuchadnezzar in sal-a a kaihte laka a om lai upate, siampite le kamsangte tungah kamsangpa Jeremiah in Jerusalem pana a laikhak ahi hi.

Jeremiah 29

Saltangte Tungah Laikhak

1 Hih in, Babylon pan Jerusalem ah Nebuchadnezzar in sal-a a kaihte laka a om lai upate, siampite le kamsangte tungah kamsangpa Jeremiah in Jerusalem pana a laikhak ahi hi. 2 (Hih in kumpipa Jehoiachin ^{▼▼29.2 Hebrew ah Jeconiah pen Jehoichin tawh kilamdang lo} le kumpipanu, kumpi inn sung uliante le Judah le Jerusalem a makaite, khutsiamte le limsuaih siamte, Jerusalem pan salin a kikaih khit ahi hi.) 3 Amah in Shaphan tapa Elasah le Judah kumpipa Zedekiah in Babylon-a kumpipa Nebuchadnezzar kiangah a sawl Hilkiah tapa Gemariah tungah ap-a a khak ahi hi. Tua sungah:

4 Jerusalem pan Babylon ah sal-a ka puakte khempeuh tungah, Israel-te Pasian Thahatpen TOPA in ka gen hih ahi hi: 5 “Inn lam unla teng un; huanah na suan unla, a gah ne un. 6 Zi pi unla tanu tapa tawi un; na tapate un zong tanu tapa a tawi theih nadingun a zi ding uh zonsak unla, na tanute uh zong mokhak un. Tua lai-ah pung unla kiam kei un. 7 Sal-a kong puakna khuapi kilem nading le a phattuam nading zong na zong ding uh hi. TOPA tungah thu ngetsak un; khuapi a nopsak leh no zong na nuamsa ding uh hi,” a ci hi. 8 Hihi, Israel Pasian Thahatpen TOPA gen hih ahi hi: “Note laka kamsangte le aisante kikhemzosak kei un. Mang man dinga hong hanthawnna uh na ngai kei un. 9 Amaute in kei minin zuau thu hong hilh uh ahi hi. Amaute ka sawl kei hi,” TOPA in cikhia hi. ^b
10 TOPA gen hih ahi hi: “Babylon hun sung kum sawm sagih a kim ciangin note kiangah kong pai dinga, a hehpihna tawh kamciamsate tangtungsakin hih munah kong puak kik ding hi. 11 Ahang in, note adingin ka geelnate ka thei hi, “TOPA in cikhia a, “Na nat nading uh hi loin na nopsak nading uh geelnate, note ading lemetna le mailam hun hoih piak ding geelnate ahi hi. 12 Tua ciangin kei tungah hong ko-in kei kiangah hong pai-in thu nong ngen ding uh a, note thungetna kong ngai ding hi. 13 Nong zong ding uh a na lungsim khempeuh uh tawh nong zon uh ciangin nong mu ding uh hi. 14 Note in kei nong mu ding uh a, na saltanna panun kong puak kik ding hi,” ^{▼▼29.14 Ahikeh na mailam hun uh kong bangsak ding hi.}TOPA in cikhia hi. “Sal-a kong hawlkhiatna minamte le munte khempeuh panin kong kaikhawm kik ding hi,” TOPA in cikhia a, “Sal-a kong puakkhiatna mun mah ah kong puak kik ding hi,” a ci hi.
15 “Babylon ah eite adingin kamsangte TOPA in lamto hi,” na ci thei ding uh hi. 16 Ahi hangin David kumpi tokhom tunga tu kumpipa, khuapi sunga a om lai mite le no tawh sal-a kikaikhawm lo gam sunga na mipihte uh tawh kisai-in TOPA thugen hih ahi hi - 17 hihi, hih in Thahatpen TOPA thugen ahi hi: “Keimah in amaute tungah namsau, kialpi le pulpi ka tungsak dinga lim lo lua-a a kine thei lo theigah ka bangsak ding hi. 18 Amaute namsau, kialpi le pulpi-in ka nungdelh dinga leitung kumpi gamte khempeuh in mudah in, amaute ka hawlkhiatna minam khempeuh lakah kisimmawh, kizahko-in, kimawhsak dinga, hamsiatna le a lipkhaphuai in kizang ding uh hi. 19 Ahang in, amaute in ka thu a ngai kei uh hi,” TOPA in cikhia a, ka nasem kamsangte tunga amaute ka theihsak kikkikte a ngai kei uh hi,” TOPA in cikhia hi.
20 Tua ahi ciangin, Jerusalem pan Babylon a kong puakkhiat no saltangte khempeuh aw, TOPA kammal za un. 21 Israel Pasian Thahatpen TOPA in, keima minin no tungah zuauthu hong hilhin Kolaiah tapa Ahab le Maaseiah tapa Zedekiah-te tawh kisai-a a gen hih ahi hi, “Amaute Babylon kumpipa Nebuchadnezzar tungah ka pia dinga, amah in note muh tektek in a that ding hi. 22 Amaute hangin Judah pana Babylon a saltangte in: “Babylon kumpipa in Zedekiah le Ahab, mei-a a khul bangin TOPA in hong bawl hen,’ ci-in kihamsiatna-in a zang ding uh hi. 23 Ahang in, amaute in Israel gamah mawhna siahuai bawl uh a; a vengte uh zite’ angkawmin kei sawl lohpi ka minin zuauthu a gen uh hi. Kei mah in ka thei a, teci ka hi hi,” TOPA in cikhia hi.

Shemaiah tunga Thupuak

24 Nehelam-te Shemaiah tungah, 25 “Hih in Israel Pasian TOPA gen ahi hi: Nangmah in Jerusalem a om mi khempeuh tung, siampipa Maaseiah tapa Zephaniah tung le siampi dangte khempeuh tungah nangma minin lai na khak hi. Zephaniah tungah, 26 ‘TOPA inn uk dingin Jehoiada munah siampi dingin TOPA in nang hong koih hi-a; kamsang banga nasem mihaite khumcipin kol na bulh ding hi. 27 Tua ahileh bang hangin note laka kamsanga kineipa Anathoth a Jeremiah tai lo na hi hiam? 28 Amah in ei Babylon a omte tungah: A hun sawtpi hi ding hi. Tua ahi ciangin inn lamin teng un; huan ah singno suan unla a gah ne un, cih thupuak hong khak hi,’ ci-in gen in,” hong ci hi. ^d

29 Siampi Zephaniah in kamsangpa Jeremiah zakin hih laikhak a simkhia hi. 30 Tua ciangin Jeremiah tungah TOPA thu tunga: 31 “Hih thupuak saltang khempeuh tungah khak in: ‘Hih in Nehelam-te Shemaiah thu TOPA gen ahi hi: Shemaiah in kei sawl lohpi thu hilh a, zuauthu note hong umsak ahi manin 32 TOPA gen hih ahi hi: Keimah in Nehelam-te Shemaiah le a suan a khakte dan ka tuaksak taktak ding hi. Amah in kei langpanga thu hilh ahi manin ka mite adingin na hoih ka bawl dingte hih mite lakah khat beek a mu kha kei ding hi, TOPA in ci hi,’ ci-in gen in,” a ci hi.